Rigg-krangel om tresifra millionbeløp

Odfjell Drilling, som driv riggen Island Innovator for Island Drilling Company, meiner riggselskapet i Ulsteinvik skuldar 110 millionar kroner.
17. oktober i år fremja Island Drilling på si side eit krav på 269 millionar kroner mot Odfjell Drilling.
Striden kjem fram i notane i Odfjell Drilling sin kvartalsrapport for tredje kvartal.

Voldgift

I følgje kvartalsrapporten vil Odfjell Drilling ta saka til voldgift, og striden er venta å bli handsama i mai 2015.
Voldgift er ei metode å løyse juridiske konflikter på utan å gå innom det vanlege rettsapparatet, og bruk av voldgiftsdomstol er gjerne avtalt allereie når kontrakter blir inngått.
I følgje noten gjeld striden betaling for arbeid og utstyr då riggen låg ved verkstad ved Hanøytangen ved Bergen 2013.

Tøff start - god drift

Riggen blei både dyrare og tok lenger tid å bygge enn planlagt, og då den låg for klargjering ved Hanøytangen i Hordaland i 2013 tok den inn vatn og krenga. Opprettinga og utbetringa forseinka arbeidet ytterlegare.
- Etter at vi segla frå Hanøytangen har riggen fungert veldig godt, sa administrerande direktør Roger Simmenes i Island Drilling Company ASA etter å ha lagt fram halvårsreksnskapen for Island Drilling Company.
Kontrakten med oljeselskapet Lundin gir arbeid til riggen ut 2016, sa Simmenes.

Selskapet er og nøgd med resultatet pr. tredje kvartal (sjå tabell), men peikar på at det at i dagens riggmarknad er ein stor fordel å ha leigt ut riggen på ei langsiktig kontrakt.

Sunnmørsk riggselskap

Sjølv om Island Drilling Company har hovudkontor på Kokstad ved Bergen og blir drive av bergenske Odfjell Drilling, er det langt på veg eit sunnmørsk riggselskap det er snakk om.
Island Offshore-systemet, med Morten og Håvard Ulstein i spissen, er storaksjonærar i selskapet, og har spelt ei sentral rolle både i etablering og i å få riggen fram til operativ stand. Selskapet Island Offshore V as eig 31,9 prosent av aksjane, Island Offshore XII KS 5,5 prosent og familieselskapet Borgstein 2,19 prosent.
Finansdirektør i selskapet arbeider dessutan frå Ulsteinvik. På generalforsamlinga i sommar vart banda ytterlegare undstreka ved at boreselskapet skifta namn frå Maracc til Island Drilling Company.
Selskapet er notert på Norges Fondsmeglerforbunds liste over ikkje-børsnoterte aksjar.

Usamde om rekninga

– Bakgrunnen for voldgiftssaka er relatert til verkstadsklargjøring av Island Innovator. Eg kan ikkje gå inn på meir detaljar enn det. Usemja knyter seg til arbeidet, seir Gisle Johanson, kommunikasjonssjef i Odfjell, til .
Styreleiar Øyvind Lund i Island Drilling Company stadfestar og at det er ein konflikt mellom dei to selskapa.
- Vi har ei sak som går til voldgift, seier han.