Satsar på simulatorredning

Fosnavåg Ocean Academy vedtok å melde oppbod i desember i fjor, etter fleire år med store tap. Denne veka skal dagleg leiar Aleksander Leine og bustyrar Thore Heggen møte aktørar som kan vere interessert i å drive vidare.
- Eg vil tru dette bør vere på plass i løpet av våren, og kanskje ikkje langt utpå heller, sa Heggen under skiftesamlinga i Fosnavåg Ocean Academy i Søre Sunnmøre tingrett i dag.

20,5 millionar i gjeld

Simulatorsenteret blei bygd for å tilby kurs til mannskap på offshoreskip, men blei råka både av fallet i offshoremarknaden og ei regeleendring som reduserte etterspørselen etter trening i simulator.
Trass fleire forsøk på å sikre lønsam drift, mellom anna å få brønnbåtreiarlaget Sølvtrans inn som medeigarar, lukkast ikkje selskapet å drive i pluss, og i desember i fjor bestemte styret seg for å kaste inn handkleet.

Gjelda er på 20,5 millionar kroner og Sparebank1 SMN (9,3 millionar) og Innovasjon Norge (11 millionar) er dei to største kreditorane.

Lite verdt

Simulatorsenteret held hus i ein eigen seksjon i bygget som husar kino, konsertsal og hotell i Fosnavåg. Seksjonen var eig av Fosnavåg Ocean Academy og seksjonen er spesialbygd for anlegget.
Det gjer at det vil vere kostbare å ta ut utstyret i seksjonen og klargjere den for anna bruk, og difor meiner Heggen at den beste måten å sikre verdiane på er å finne ein aktør som vil drive vidare.