Sender naudstraumsaggregat til Ukraina

Rundt halvparten av ukrainsk energiinfrastruktur er øydelagd av russiske missilar og dronar. No ønskjer Mørenett å hjelpe Ukraina med materiell og utstyr for reparasjon og gjenoppbygging av straumnettet, og med utstyr for naudstraumsforsyning.

I ei pressemelding viser Mørenett til at i Noreg samarbeidar NVE (Norges vassdrags- og energidirektorat), bransjeorganisasjonen REN og nettselskapa om å samle inn og transportere aktuelt utstyr.

Forsyner 30 husstandar
Mørenett deltek i dette samarbeidet, og i første omgang blir det sendt naudstraumsaggregat.

- Transporten startar 2. desember og vi håpar at utstyret kjem raskt på plass og vert til nytte.

- I denne omgang donerer Mørenett eit naudstraumsaggregat på 140 kW. Dette vil kunne forsyne rundt 30 husstandar eller til dømes delar av eit sjukehus med straum, seier Arve Hovdenakk, divisjonssjef montasje i Mørenett.

Vurderer å sende meir
Mørenett vil også vurdere nye sendingar av reparasjonsmateriell og utstyr framover i tid.

- Mørenett sitt bidrag løyser ikkje Ukraina sine utfordringar med kraftforsyning, men ei norsk samarbeidsløysing kan vere til stor nytte inn i ein vinter som ser ut til å bli særs krevjande, seier Hovdenakk.