I dag signerte partane avtalen som formaliserer eigarskiftet.
Prodtex har utvikla ei løysing for automatisert stålproduksjon og fekk eit gjennombrot i februar då selskapet kapra oppdraget om å bygge ei pilotbru for Statens vegvesen.

Etter at Prodtex fekk til saman 27 millionar kroner i støtte og lån og støtte frå Innovasjon Norge bestemte selskapet seg for å kjøpe storparten av anlegget på Fiskeåholmen, i staden for å vere leigetakar.

Lokal arbeidskraft

Det er eit samla styre i Vanylven Eigedom AS som no er nøgd med å lande dette salet med eit seriøst firma, som er opptatt av å rekruttere lokal arbeidskraft, skriv Vanylven-ordførar Lena Landsverk Sande i ei felles pressemelding frå kommunen og Prodtex.
"Prodtex driv med metallkonstruksjon etter metodar som vil bidra til meir effektiv brubygging. Dette vil gagne lokale, nasjonale og internasjonale prosjekt på sikt. Deira måte å revolusjonere brubygging på vil gjere store samferdselsprosjekt meir effektive, både konstruksjons- og kostnadsmessig. Dagleg leiar i Prodtex Industri, Tore Roppen, seier han ser fram til å bygge opp ei framtidsretta næring på Fiskå i Vanylven.", heiter det i pressemelding. Prodtex Industri er eit datterselskap av Prodtex.

Nedlagt seksjonsverft

Vanylven kommune kjøpte industrianlegget på Fiskeåholmen etter at Ulstein Group la ned skrogseksjonsbygginga der i 2015.
Etterpå har kommunen arbeidd for å få ny drift i anlegget.