Siktar mot dobling på fiskeri og oppdrett

Evotec i Ulsteinvik skal levere elektriske vinsjar og -system til Liegruppen sin nye fiskebåt, den pelagiske trålaren Liafjord.

Kontrakten er på omlag 20 millionar kroner, og er den andre fiskebåtkontrakten for Evotec i år. Den første var omlag like stor.

I fjor fekk Evotec inn to slike kontraktar, til omlag 45 millionar kroner, ifølgje salssjef for fiskeri i Evotec, Håkon Woldsund. Selskapet har forventningar om å passere 2020-omsetninga frå fiskeri allereie i første halvår.

Heite prosjekt
- Vi jobbar med mange heite prosjekt og har ambisjonar om å lande meir før det blir ferie, seier Woldsund.

Målet for 2021 er ei dobling samanlikna med 2020 og selskapet ventar at fiskeri- og oppdrettsnæringa kan bli den viktigaste marknaden for selskapet etterkvart, ifølgje Woldsund.

I 2019 hadde Evotec 157 millionar kroner i driftsinntekter og eit resultat før skatt på 11,6 millionar kroner i driftsinntekter.

Selskapet er ein del av Entec Group, med søsterselskapa Brimer og Servitech.