Skal frakte cruiseturistar med el-buss

- Dette blir stas! Vi har lenge snakka om ei framtid med grøne bilar og bussar, no er framtida her» seiar ei stolt Eli Førde Aarskog, marknadsjef i Seawalk Nordfjord, i ei pressemelding.

Seawalk Nordfjord startar med opplegget 7. juni. Nullutsleppsbussen har plass til 16 personar, med ei maksfart på 25 km/t. Det vert fleire avgangar gjennom dagen.

Landstraum og el-rib
Det blir opplyst at cruisehamna på Nordfjordeid er ambisiøs når det gjeld grøn teknologi. Det vert arbeidd aktivt med å få på plass landstraum so raskt som råd. Slik at cruiseskipa slepp å nytte generatorar når dei er fortøya.

Frå før tilbyr ein også elbilutleige, og det er planar om elektriske RIB-båtar.

- Dette er berre starten på ei omstilling i bransjen, og her skal vi vere med. Med El-bussen kan vi vise fram det Nordfjordeid sentrum har å tilby på ein spanande og miljøvennleg måte, seier Arild Åshamar, dagleg leiar i Seawalk Nordfjord.

El-bussen vil køyre frå Hamna til Malakoff via Eidselva, der gjestane får informasjon om militærhistoria til Nordfjordeid. Turen går vidare gjennom Eidsgata til Eid kyrkje og avsluttar på vikingsenteret Sagastad.