Skal gjere det lettare for utlendingar på Nordvestlandet

Poenget med spørjeundersøkjinga er å finne ut kva utlendingar som er rekruttert til bedrifter på Nordvestlandet saknar og ønskjer seg. 

Spørjeundersøkjinga pågår no, og planen er å fullføre den om kort tid.

Målet er at Næringsforeningen Ålesundregionen skal vere med og utvikle tilbod som lettar overgangen ved å flytte frå utlandet - og auke attraktiviteten til arbeidsmarknaden på Nordvestlandet.

Næringsforeningen vurderer mellom anna eit innføringskurs om samfunn og regelverk. Det kan gjelde alt frå å få barnehageplass, til å etablere eiga bedrift, seier prosjektleiar Trine E. Hofseth Helgå i Næringsforeningen Ålesundregionen til Nett No.

Planen er å kome i gang før sommaren.

Møteplassar
Næringsforeningen vil også etablere møteplassar i form av ulike arrangement for å hjelpe utanlandske arbeidstakarar til å etablere eit sosialt nettverk på Nordvestlandet.

Næringsforeningen i Stavanger har allereie eit tilbod til arbeidstakarar frå utlandet i sin region. 

Hofseth Helgå seier Næringsforeningen Ålesundregionen planlegg å kome med tilbod etter ein liknande modell.

Auka etterspørsel
I 2012 sto Næringsforeningen bak ei liknande opplegg som no er under planlegging.

No har bedrifter i regionen på nytt kome med innspel om at det er behov for liknande tiltak igjen, ifølgje Hofseth Helgå. 

Det er bakgrunnen for spørjeundersøkjinga og planane om å etablere tilbod retta mot utlendingar som har flytta til Nordvestlandet.