Slik blir kontantstønaden for bedriftene

(NPK-NTB-Johan Falnes): Etter det NTB kjenner til, vart finanskomiteen på Stortinget orientert om innhaldet torsdag.
LO og NHO har vore i dialog med Finansdepartementet gjennom veka om den nye kompensasjonsordninga, som formelt skal leggjast fram fredag.
Den såkalla kontantstønaden skal dekkje faste utgifter som husleige og forsikringspremie for bedrifter som har opplevd å miste store inntekter på grunn av tiltaka som er sette i verk for å stoppe spreiinga av koronaviruset.
Finansminister Jan Tore Sanner (H) har tidlegare anslått at ordninga vil koste rundt 20 milliardar kroner i månaden.

Terskel for å kome med

I skissa, som NTB har fått tilgang til, blir det lagt opp til at bedrifter må ha opplevd eit fall i omsetninga på 30 prosent eller meir per månad frå og med april for å kome med.
For mars blir kravet sett til 20 prosents fall, sidan krisetiltaka først vart innførte litt ut i månaden.
Ordninga skal i utgangspunktet gjelde for mars, april og mai.
Det blir òg lagt opp til at bedrifter som har vorte pålagde å stengje, som frisørar, skal få større kompensasjon enn andre. Desse vil få dekt 90 prosent av dei faste kostnadene, medan andre bedrifter får dekt 80 prosent og i tillegg må betale ein eigendel på 10.000 kroner per månad.
Nedre terskel for utbetalingar blir sett til 5.000 kroner, medan øvre grense blir sett til 30 millionar kroner.
Det var og som omtala skissa først.

Omfattar ikkje alle

Den nye ordninga vil ikkje gjelde alle sektorar. Dei som blir haldne utanfor, er mellom anna finansnæringa, olje og gass og flyselskap.
Føretak som er utan tilsette, utan aktivitet eller under konkursbehandling vil heller ikkje vere kvalifiserte til stønad.
Finansdepartementet tek atterhald om at ordninga må godkjennast av EØS-tilsynet ESA før ho kan tre i kraft.
Ifølgje TV 2 vil det bli lansert ein portal der bedrifter kan søkje frå 17. april. Finans Norge skal ha ansvar for portalen.

Forhandlingar i vente

På Stortinget er det venta forhandlingar gjennom helga og fram mot påskeferien om ordninga.
Arbeidarpartiets Terje Aasland meiner det viktigaste er å få plass ei ordning som faktisk treffer dei bedriftene som no står på randa av konkursen og treng hjelp.
– Men når vi no skal bruke store pengar frå fellesskapen, er det viktig at vi òg klarer å sikre at dei som får pengane, er seriøse og ikkje prøver å utnytte situasjonen, åtvarar han.
Arbeidarpartiet vil derfor kjempe for gode kontrollmekanismar, held Aasland fast på.
– Det er store pengar som skal ut. Vi må sørgje for at det skjer på ein ordentleg og ryddig måte, seier han til NTB.

Fryktar sugerøyr

Også LO har åtvara regjeringa mot å forme ut eit regelverk som ikkje er stramt nok.
– Det vi ikkje treng, er ei ordning som gir useriøse bedrifter eit sugerøyr ned i statskassa, seier LO-leiar Hans-Christian Gabrielsen.
– Vi veit at det alltid vil vere ein risiko for at det er bedrifter som vil prøve å utnytte slike ordningar. Vi har vore tydelege overfor regjeringa på at ein må ha gode ordningar for kontroll, slik at vi luker ut dei useriøse bedriftene, seier han.
(©NPK)