Stor laks hos Salmon Evolution

I ein produksjonsoppdatering skriv det landbaserte oppdrettselskapet Salmon Evolution at heile det første utsettet av smolt i fjor vart slakta i løpet av november og desember. Snittvekta var på 3,75 kilo for sløgd og hovudkappa fisk.

I alt er det snakk om 340 tonn, der 96 prosent av fisken vart klassifisert som superior kvalitet.

For superior kvalitet fisk over tre kilo, fekk Salmon Evolution betalt 75-78 kroner kiloen.

Les børsmelding her

Neste slakting i andre kvartal
Den første smolten som vart sett ut hos Salmon Evolution-anlegget på Indre Harøy i Romsdal, vart slakta i tre omgangar. I første runde var 10 prosent av fisken under tre kilo, i siste runde to prosent.

Det andre utsettet av smolt hos Salmon Evolution er no oppe i i ei gjennomsnittsvekt på 1,85 kilo og skal slaktast i andre kvartal i år, ifølgje oppdateringa.

Hittil har Salmon Evolution sett ut smolt i fire omgangar i anlegget og skal sette ut smolt for femte gang i februar i år.

Då børsen stengte tysdag var kursen for Salmon Evolution-aksjane 8,22 kroner.

Ved børsopning onsdag steig den til 8,42 kroner aksjen.