Stor skaparkraft i ytre - Stryn skil seg ut i indre

Ingen av dei arbeider direkte i maritim sektor, men vedgår at det er den høge aktiviteten i den maritime industrien er heilt avgjerande for at dei sjølve lukkast.
- Det har gått bra. Interessa for produkta og kompetansen til selskapet er aukande, seier Tommy Pettersen i data- og konsulentselskapet Datawaves.
Cecilie Hatløy i Lykkeliten Studio melder også om stadig fleire oppdrag med babyfoto.
- Det er tydeleg at både bedrifter og privatpersonar er villige til å bruke pengar på gode bilde.
Også for naprapat Ole Theodor Hovden i Nordvest Napratpatklinikk er det rekordhøg aktivitet. Og det er først og fremst stive ryggar og nakkar som vert behandla.
Interessa for våre tenester er heilt klart aukande, og sjølve meiner vi at vi er ein viktig bidragsytar til å halde flest mogleg i arbeid.

Ulstein til topps

NETT NO har kåra Ulstein som årets næringslivskommune i Nordvest i 2013. Bakgrunnen for kåringa er ei rekkje statistikkar som er presentert i det første NETT NO-magasinet.
Ulstein toppar statistikkane for driftsinntekter per innbyggjar, gjennomsnittleg resultat før skatt og antal nyetableringar siste fem år. Med 21,6 milliardar kroner plasserer Ulstein seg på andreplass – bak suverene Ålesund – i totale driftsinntekter for næringslivet, og Ulstein er på fjerdeplass når det gjeld antal bedrifter per innbyggjar.
På statistikkane er det kystkommunane som dominerer, der spesielt Herøy og Ålesund pustar Ulstein i nakken, og der Vågsøy også plasserer seg høgt oppe.
På den andre enden av skalaen er Norddal og Hornindal gjengangarar.

Gamalt mønster

Historikar Eldar Høidal har studert statistikkane, og finn att eit gamalt mønster.- Det er på kysten, i kommunar som Haram, Ulstein, Herøy og Vågsøy at ein har mest aktivitet og nyskaping. Dette har med bondekultur og fiskarkultur å gjere, der fiskarkulturen har vist stor evne til satsing og nyskaping, medan bondekulturen er meir traust.
Høidal er i ferd med å skrive næringshistorie for Sunnmøre, og meiner at det næringsmessige styrkeforholdet mellom kommunane ikkje har endra seg så mykje dei siste 100 åra.
- Fiskeria har generert store inntekter, noko som har ført til god kapitaltilgang. Men i tillegg har fiskarane hatt sterk konkurranse og har heile tida vore nøydde til å utvikle seg.
- Endringsvilja i kystkommunane har vore stor, og ser vi på statistikkane har dette tydelegvis gått i arv.

Næringsvenlege Ålesund

Han synst heller ikkje det er merkeleg at Ålesund kjem så høgt opp på statistikkane.
- Heilt sidan spansketida på 1830-talet har Ålesund vore i fremste rekkje i regionen på næringsliv, og då spesielt knytt til fisk. I Ålesund har det vore god tilgang til kapital, i tillegg til at ein gjennomgåande også har hatt ei politisk leiing som har lagt til rette for næringsutvikling.
Sjølv om ytre knuser indre på dei fleste statistikkane, er ikkje bildet eintydig. Spesielt har Høidal merka seg utviklinga i Stryn.
- Ja, sjå på Stryn. Der har ein makta å få til eit meir allsidig næringsliv, sjølv om Stryn tradisjonelt var dominert av landbruksinteresser.