Kleven Verft skal byggje ein 65 meter lang, 17 meter brei og 6 meter høg «stålkasse» til Ulstein Betong Marine.
Den store stålkassa skal brukast i samband med at Haddal-selskapet skal byggje ei ny dokk for produksjon av store flytemoloar og flytekaier.
- Vi ser aukande etterspørsel etter både flytemoloar og flytekaier, og treng ei eiga dokk for slik produksjon.

Ørsta-samarbeid

Det seier dagleg leiar Asbjørn Tronstad ved Ulstein Betong Marine.
Selskapet har i dag eiga tørrdokk på rundt 98 meter lengde og 23 meter breidde der ein til no har bygt både fórflåter for havbruksnæringa, flytemoloar og større flytekaier.
- For å auke effektiviteten og produksjonskapasiteten har vi no behov for å skilje produksjonen av store fôrflåter og flytekaier- og moloar, seier Tronstad.
Flytemolane og størstedelen av flytekaiene vert produserte i nært samarbeid med Ørsta-firmaet Marina Solutions.

Flytemolar med 'naust'

Tronstad seier at det kjem stadige forespørslar om bygging av flytemoloar til småbåthamner, men også om bygging av flytekaier til offentlege prosjekt.
- Flytande betongkonstruksjonar er noko vi har stor tru på framover.
- Spesielt er det stor interesse knytt til flytemoloane med svært god bølgjedempande effekt for å verne båthamner, men som samstundes også har lagerrom innvendig i skroget.
Han seier at i desse lagerroma kan den enkelte båteigar oppbevare utstyr like ved båten.
- Dette fungerer på mange måtar som eit naust.

Storplanar i Ålesund

Tronstad seier at bruksområda for flytekaier er svært store og det er berre fantasien som set grenser.
- Som eit døme på dette føreligg det planar om å etablere ei promenadekai i 800 meter lengde frå Skotholmen til Meierikaia i Ålesund.
- Det føreligg også planar i Horten om å etablere eit anlegg for 30 flytande bustader, og eg trur at vi berre har sett starten på ein vekstmarknad.

Flyttar produksjonen

Bygginga av den nye dokka for produksjon av flytekaier/flytemoloar er kostnadsrekna til 30 millionar kroner og er planlagt ferdig til 1. september i år. Det første prosjektet står allereie og ventar, opplyser Tronstad.
I samband med utbygginga av dokka, skal også resten av produksjonen for Ulstein Betong Marine flyttast frå den eksisterande påbyggingskaia til den nye kaia som vart bygd for eit par sidan..
- Vi skal byggje eit nytt lager på 800 kvadratmeter, i tillegg til dei nødvendige fasilitetane for våre tilsette.
- Dette er ei storsatsing frå vår side, seier Tronstad.