Stort løft for Geiranger Bryggeri

- Vi har gått frå det simplaste kinesiske bryggesystemet til det mest avanserte tyske. Dette er nærmast fullautomatisert, som gjer at vi halverer arbeidsmengda når vi skal brygge eit øl.

Det seier dagleg leiar Frank Maråk i Geiranger Bryggeri.

Mange ølmerke
Selskapet satsar friskt vidare og har finansiert nysatsinga i stor grad gjennom aksjekapitalauke og privat lån.

Geiranger Bryggeri har ei rekke ølmerke som Friaren, Vikingstøa, Bølga, Helvetesjølet og Sju Søstre.

No skal produksjonen effektiviserast, og målet er auka sal og auka sysselsetjing.

I fjor vart det seld øl for 2,2 millionar kroner, og resultatet før skatt enda på 0,3 millionar.

Dårleg juli
- Eit år på det jamne. Vi fekk ein dårleg juli på grunn av skitvêr, seier Maråk.

Han eig 58,62 prosent av selskapet. Jakob Torp Årset eig 20,69 prosent og Karl Mjelva, Stian Peter Merok og Kenneth Skarbø Løken eig kvar 6,9 prosent.

Geiranger Bryggeri har 2,6 millionar kroner i eigenkapital og 2,0 millionar i langsiktig gjeld.