Stranda ber om overgangsreglar for cruiseskip

Sjøfartsdirektoratet har foreslått strengare reglar for verdsarvfjordane. I tillegg gjorde Stortinget i fjor eit vedtak om nullutslepp i dei mest populære turistfjordane frå 2026.
Stortingsvedtaket vil føre til at det ikkje kjem eit einaste cruiseskip inn i Geirangerfjorden og til Flåm frå 2026. Det trur Aurland og Stranda, som begge har populære turistfjorda med verdsarvstatus. Grunnen er at teknologien som må til for å oppfylle kravet ikkje er på plass, meiner dei.
Det kom fram då Stranda og Aurland, saman med sine hamneselskap, møtte stortingsrepresentantane frå Møre og Romsdal på Atlanterhavsparken i Ålesund i dag.

Vil ha nasjonale krav

Stranda og Aurland vil primært ha nasjonale krav til cruisetrafikken, fordi kommunane fryktar trafikken ellers blir flytta til andre fjordar - og at inntektene som følgje med cruisetrafikken forsvinn frå dei to kommunane.
Strandaordførar Jan Ove Tryggestad ber og om meir tid for på oppfylle Stortingsvedtaket, kombinert med konkrete krav til cruise-bransjen.
Dersom reiarlaga forpliktar seg til å bygge skip som kan tilfredsstille utsleppkrava innan 2030 bør dei får overgangsordingar som gjer det det lov å halde fram med eksisterande skip også etter 2016, seier Tryggestad.
Både Helge Orten (H) og Fredric Holen Bjørdal (Ap) var imøtekomande til innvendingane frå Stranda og Aurland og opna for å revurdere tidspunkt for innføring av reglane.