Svelekontrakt til Minibakeriet

- Det er ein veldig god deal for oss, seier Leon Knapskog, grunnleggar av Minibakeriet.
Alt seint i går ettermiddag starta steikinga av 1500 sveler hos Minibakeriet. Steiking og smøring har pågått heile natta for å forsyne dagens reisande med gratis smaksprøver. No er sveler og sandwich nettopp levert ombord i elferja "Gloppefjord", som skal i ordinær rutetrafikk frå klokka 13.00 i dag.

Rabalder

Det blei rabalder då det blei kjent at det ikkje blir kiosk - og svelebaking ombord - på dei to elferjene som skal trafikkere Lote-Anda.
Administrerande direktør Dagfinn Neteland i Fjord1 seier at avtalen med Minibakeriet kan bli betydelig utvida dersom svelene - som blir selde frå automatar - fell i smak.
- Definitivt, seier Neteland.

Fleire samband

I første omgang er det aktuelt å innføre svelesal frå automat på Fjord1-samband som ikkje har cateringtilbod i dag, og utanom opningtid på dei ferjene som har kiosktilbod.
- Vi ønskje å utvikle dette, seier Neteland om bruk av automatar der reisande kan kjøpe drikke og mat, deriblant sveler.

God vekst

Minibakeriet blei starta i 2015.
I 2016 hadde det 3,7 millionar kroner i driftsinntekter og eit resultat i balanse. Bakeriet har fire tilsette.