Tek to skip ut av opplag

- Det er framleis smått med oppdrag for dei større seismikkfartøya som opererer med 12 til 14 kablar.
- Derimot er det betydeleg auke i etterspørselen etter reine skytebåtar.
Det seier direktør Ivar Slettevoll i Sanco-reiarlaget i Gjerdsvika.
Selskapet har sju seismikkfartøy og støttefartøy for seismikk. I over eit halvt år har båtane Sanco Spirit og Sanco Star lege i opplag.

Oppdrag i Angola

No er begge i full aktivitet igjen.
- Dette er svært gledeleg, seier Slettevoll.
Les her:
Sanco Spirit har lege i opplag på Moltu, men er no på veg til vestkysten av Angola for å fungere som rein skytebåt.
- Det er eit anna skip som samlar inn og handterer all data som vert samla inn.
- Skytinga skal foregå på eit eksisterande felt, både ved og under plattformer, seier Slettevoll.
I første omgang er det snakk om jobb i rundt to månader.
- Men vi trur at det ordnar seg med meir oppdrag relativt fort.
Dette er godt nytt for mannskapet på 20 som har vore langtidspermitterte.

Til Mexicogulfen

Også Sanco Star er i ferd med å forlate opplagsplassen på Las Palmas.
Dette skipet har tidlegare drive med seismikk ved hjelp av botnkablar. No vert båten bygt om til å utføre reine skytejobbar.
- Vi installerer ein komplett skytepakke til rundt 40 millionar kroner.
- Vi skal ta oss av skytinga sjølve, noko som vi ikkje har gjort før, seier Slettevoll.
Sanco Star skal i oppdrag for eit selskap i Mexicogulfen, på ein kontrakt som i utgangspunktet varer ut året.
- Men vi har opsjonar som vi har god tru på vert realiserte.

PGS-kontrakt

På dette skipet har Sanco vel 20 mann, medan operatøren i tillegg vil ha eit tilsvarande antal om bord.
Sanco har også seismikkskipet Sanco Sword liggjande i opplag i Farsund. Dette skipet er utleigd til PGS.
- Vi får betaling for skipet, men vi håpar sjølvsagt at skipet snart kjem i arbeid igjen.
- Men for denne typen skip ser marknaden framleis tung ut, seier Slettevoll.

Trur på bra 2018

Sjølv om det lysnar for Sanco, trur Slettevoll at resten av 2017 vert tung for mange av dei større aktørane.
- Men frå 2018 av er det mykje som tyder på at det vil lysne.
- Det er klart aukande aktivitet og forespørslar, ikkje minst frå Asia, Sør-Amerika, Mexicogulfen og Vest-Afrika.
- På litt sikt ser det slett ikkje så aller verst ut.