Tente i Latvia - tapte i Vietnam

Hareid-selskapet er inne i sitt 62. driftsår, og har spesialisert seg på produksjon av skipsutstyr, i hovudsak dører og luker.
I fjor fall inntektene med vel 26 millionar kroner i høve til året før, men driftsresultatet enda likevel nesten på nivå med 2015.
Det siste er leiinga nøgd med, og viser til stor fokus på kostnadsinnsparande tiltak.
Resultatet før skatt vart på 9,4 millionar kroner, mot 20,2 millionar året før.

Stort Vietnam-minus

Årsaka til det reduserte resultatet skuldast tap på valuta, samt redusert utbyte frå dotterselskap og tilknytta selskap.
Mellom anna eig Libra-Plast 33,33 prosent av Vinivest i Vietnam, eit selskap som gjekk med 24,7 millionar kroner i minus i fjor.
Derimot var det plusstal frå Libra-Plast sine latviske dotterselskap, men ikkje nok til å kompensere tapet i Vietnam.
Styret skriv at det vert sasta vidare på desse selskapa, mellom anna gjennom eit arbeid med å få dei ISO-sertifiserte.

Norsk vekst

Eksporten i fjor var på 65,8 millionar kroner, ned frå 73,1 millionar i 2015. Reduksjonen kom mest i EU/EØS-området.
Derimot var det vekst i Norge, der samla sal kom opp i 42,5 millionar kroner.
Selskapet har 24 tilsette, og hadde i fjor eit sjukefråver på 3 prosent, mot ni prosent året før.
Libra-Plast har nulltoleranse mot mobbing, og har slått fast at ein også har full respekt for ulik religiøs og etnisk bakgrunn.
Arne Lillebø eig 90,1 prosent av selskapet gjennom Libra Group, medan dagleg leiar Einar Pieroth eig 7,9 prosent. Per Grimstad og Armand Nystad eig kvar ein prosent.