Treng fleire skipsingeniørar

- 2017 og 2018 var dårlege år for oss. Det vart nesten full stopp i kontrahering av større kystbåtar, det segmentet vi har satsa på.
Det seier dagleg leiar Erlend Hagen i skipsdesignselskapet.
Han viser til at mange reiarar sette seg på gjerdet ettersom det var uklarheit i regelverket rundt lasteromsvolum.
- Men no har det losna. Det ser bra ut framover.

Fleire tilsette

Selskapet jaktar no tre nye skipsingeniørar etter å ha fått fleire nye oppdrag.
Blant anna skal selskapet designe den 51 x 13 meter store kombinerte snurrevadaren, snurparen og trålaren Elias Johan for ein reiar i Lofoten.
- Her var det mykje fram og tilbake før selskapet fekk erversløyve, men no er det endeleg i orden, seier Hagen.

Trur på stor aktivitet

I tillegg skal Naval Consult designe nye Arnøytind på 50 x 12 meter til eit reiarlag i Skjervøy, og har designet på ein 28 x 10 meter stor kystbåt som no er under bygging i Polen.
- Med desse oppdraga åleine er vi sikra drift i eit års tid. I tillegg er det fleire forespørslar.
- Vi trur at det vert stor aktivitet på dette området framover, seier Hagen.

Så vidt i pluss

Selskapet omsette for 4,3 millionar kroner i fjor, og endå så vidt i pluss på botnlinja.
- I år vil vi sjå heilt andre tal, seier Hagen.
Han eig sjølv 60 prosent av selskapet, medan resten er likt fordelt mellom Johan Arve Kongsvik, Geir Kongsvik og Stian Kongsvik.