Trur på skipstunnel før påske

Samferdsleminister Knut Arild Hareide legg til grunn at Stortinget kan behandle proposisjonen for Stad skipstunnel før påske.
Det kjem fram i eit svar på eit skriftleg spørsmål i Stortinget frå Jon Georg Dale.

Kjem «så snart som mogleg»

Frp-politikaren frå Volda ville vite om Hareide ville legge fram ein investeringsproposisjon for Stad Skipstunnel for Stortinget så raskt som råd, og «i god tid før påske».
– Det er utruleg viktig at vi no kjem raskt i gang med bygging av dette viktige prosjektet, påpeiker Dale i sitt spørsmål.
Samferdsleministeren svarar at proposisjonen kjem «så snart som mogleg», og antek at det vil bli før påske. Den vil innehalde ei styrings- og kostnadsramme for skipstunnelen, som er anslått å koste kring 3,45 milliardar kroner å bygge.

Kan stå klar i 2025

I 2021 er det sett av oppstartsmidlar på 75 millionar kroner og prosjektleiar Terje Andreassen for Stad skipstunnel i Kystverket opplyste nyleg til NETT NO at ein entreprenør for prosjektet kan vere klar i løpet av neste år.
Det einaste som kan vere i stand til å rokke eit vedtak om bygging, er truleg om anboda skulle vise seg å bli betydeleg høgare enn venta.
Om alt går etter planen, vil bygginga av skipstunnelen starte i løpet av neste år, eller året deretter. Planlagt opning ligg an til å bli i 2025.

Les også:

Analyse: