Tur og trivsel er vekstbransje

I fjor var åtte aktivitet- og opplevingsselskap i sving på Sunnmøre. Nokre var heilt i startgropa i fjor, og ytterlegare fleire er på veg inn i marknaden. Dei konkurrerer ikkje kvarandre ut heller. Til saman auka aktivitetsselskapa i NETT NO si oversikt driftsinntektene med over 30 prosent frå 2016 til 2017.
Ole-Hjalmar Bonsaksen set fart og løftar rib-båten med to påhengsmotorar opp av vatnet. Den har katamaranskrog med hydrofoilvenger under. Straks den kjem opp på vengene skyt den fart. Vindsusen gjer at passasjerane ikkje legg så mykje merke til motorbrølet, men det gjer du på land.

Millioninvestering i el-rib

Men til sommaren blir det knappast ei summing å høyre - og ingen klimagassutslepp - sjølv om farta blir minst like stor. Då har familieselskapet Bonseye fått verdas to første heilelektriske rib-båtar. Der drivstofftankane ligg i dag blir det batteri, og påhengsmotoren går på elektrisitet.
Kor stor investering det er snakk om vil Ole-Hjalmar ikkje svare nøyaktig på, men det er snakk om ei millioninvestering, eit stort løft for ei nystarta og lita bedrift.

Base på garden

Rib-trafikken er berre ein del av pakken familiebedrifta tilbyr. Utgangspunktet er garden på Ljøen ved Hellesylt, med utsyn rett innover Geirangerfjorden. Selskapet har og eit bygg rett ved ferjekaia på Hellesylt, der dei som blir med på dei faste rib-båtturane i sommarsesongen får kle på seg flytedress før dei går om bord.
På garden har Ole-Hjalmar og broren Magne, som også er medeigar, bygd opp ei scene og eit delvis overbygd amfi for konsertar og utandørs servering, mellom anna av fruktvin laga av Bente Bonsaksen, største aksjonær og mor til Magne og Ole-Hjalmar. Innan kort tid er målet å ha fått på plass eit gardsutsal for vinen slik at gjestar kan kjøpe med seg ei flaske.
Byr dei på lunsj og middag har dei ein avtale med kokk på Stranda Hotel , som står for matlaging og levering.
Skulle det vere for vått og hustrig kan gjestane trekke inn i løda, som Ole-Hjalmar er i ferd med å bygge om til gildehall.

Variert tilbod

Medan Loen Activ i Loen tilbyr guida klatreturar til Hoven og Uteguiden på Stranda tek folk opp på toppar og tindar sommar og vinter, satsar Bonseye på opplevingar alle kan bli med på også om du sit i rullestol eller bruker krykker.
Dei er i “soft-segmentet”, som det heiter på bransjespråket.
Har dei gjestar som vil ha tøffare og meir krevjande turar, allierer dei seg heller med Uteguiden eller Hjørundfjorden Mountain guide.
I sommar hadde dei over 200 gjestar frå det franske oljeselskapet Total. Det er den største bestillinga selskapet har hatt så langt.
Dei fekk lunsj, historier om garden, oppvisning med gjetarhundane som passar saue- og lamaflokken, og tilbakemeldinga var så god som den kunne bli.
- Med oss så var dei 100 prosent fornøgde, seier Ole-Hjalmar Bonsaksen.
Slike tilbakemeldingar er gull verd.
- Har du fornøgde kundar, så ballar det på seg, seier Bente Bonsaksen.
Ho meiner det er realistiske å passere fem millionar kroner i driftsinntekter innan tre år. I år ligg selskapet an til å få rundt 1,5 millionar kroner i driftsinntekter.

Dreg på seg dressen

Til våren skal Destinasjon Ålesund & Sunnmøre arrangere Norwegian Travel Workshop, eit stor årleg arrangement der reiselivsselskap møter potensielle kundar, både frå Noreg og utlandet.
Bonseye satsar mykje på såkalla Mice-reiser. Mice står for “meetings, incentives, conferences and exhibitions” - altså reiser til møter, konferansar og messer og belønnings- og oppmuntringsreiser for tilsette – eventuelt ein kombinasjon av alle eller fleire av desse faktorane.
To gongar har Ole-Hjalmar dratt på seg dressen og stilt på stand for å vise fram Bonseye på Norwegian Travel Workshop. For å trekke til seg kundar på Mice-reise er Norwegian Travle Workshop alfa og omega. Det er der det er råd å møte operatørane som arrangerer slike reiser.
Gjestane frå Total i sommar var eit direkte resultat av første besøket, ei gruppe Vip-gjestar frå Brasil kom som resultat av turen til Norwegian Travel Workshop i år.