Tysk gjennombrot med katte- og hundemat

- Vi har fått eit gjennombrot i Tyskland og forventar god omsetning der framover.

Det seier dagleg leiar Ole Sande i katte- og dyrefôrprodusenten Vitbit.

Selskapet er Fosnavåg-registrert, med mesteparten av råvarene kjem frå Finefish på Sandsøya.

Etter ein forsiktig start i 2020, selde selskapet katte- og hundefôr for vel fem millionar kroner i fjor.

- Vi forventar ei dobling i år, seier Sande.

Mange produkt
Selskapet har utvikla ei rekke produkt, der mykje kjem frå tørka sei, men det vert no også satsa på produksjon på våtfôr.

- Vi reknar med å kunne lansere nokre variantar av våtfôr innan kort tid, seier Sande.

I Norgesgruppen sine butikkar vert produkta selde under merkenamnet Fauna, medan dei same produkta vert selde under merkenamnet Snadder i Rema-butikkane.

I tillegg har selskqpet sin eigen merkevare Vitbit som vert seld i Felleskjøpet i Norge og i søsterbedriftene i Sverige.

Opning i Sveits
I fjor haust fekk selskapet avtale med Febo, norges største grossist for leveransar til spesialbutikkar.

- I tillegg til Tyskland, er nokre varelinjer også på veg inn i den sveitsiske maknaden, seier Sande.

- Veksten ser ut til å gå som planlagt og vi forventar dobling også i år.

Nytt anlegg
Vitbit er ein del av Finefish-konsernet, som Ole Sande og Gjermund Bringsvor står bak, med 50 prosent eigarskap kvar.

Finesfish investerte i fjor 44 milionar i nytt mottaks- og produksjonsanlegg for kvitfisk på Sandsøya.

Det aller meste av Vitbit-produkta vert laga på Sandsøya.