Utviklingskontrakt for containerskip

Ulstein Design & Solutions skal samarbeide med Edge Navigation for å utvikle eit utsleppsfritt containerskip basert på Ulstein sitt X-Bow-design.

- Dette oppdraget er eit ideelt prosjekt for Ulstein, seier kommersiell direktør Lars Ståle Skoge i Ulstein Design & Solutions i ei pressemelding.

Edge Navigation er eit Oslo-basert ingeniør og konsulentselskap som arbeide for å utvikle skip som kan bruke drivstoff basert på fornybar energi.

- Energieffektivitet vil vere nødvendig for å lykkast med energiomstilling, og i Ulstein har vi ein partnar med ei omfattande referanseliste på innovative design, fleire av desse med den dokumenterte X-BOW^®-løysinga. X-BOW vil redusere kraftbehovet per container i eit breitt spekter av operasjonar, noko som vil senke terskelen for å skifte til framdrift basert på grøn energi, seier administrerande direktør Jakob Tolstrup-Møller i Edge Navigation i pressemeldinga.

Tolstrup-Møller og Skoge hadde sine første samtalar om containerskip med X-BOW for over 10 år sidan.