– Vi hadde håpt det skulle vere færre smitta

Situasjonen med koronasmitte mellom mannskapa som ligg til kai ved Fiskerstrand verft er under kontroll. Det meiner kommunalsjef Kjetil Fylling for helse- og sosialsektoren i Sula kommune.
– Forholda teke i betraktning meiner vi ha kontroll og oversikt over situasjonen. No ventar vi på at smittetala skal gå ned, fortel Fylling til NETT NO måndag.
Før helga fekk ni nye frå besetningane påvist koronasmitte. Det gjer at status er 45 smitta totalt som er sett i isolasjon, 145 i karantene og sju som er friskmelde.

Utfordringar med reiarlaget

Fredag fekk ni nye påvist smitte, og tre av prøvene var usikre. No blir dei aller fleste av mannskapa testa på nytt og desse prøvesvara er ikkje venta før tysdag.
Kommunalsjef Fylling påpeiker at det er avgjerande at reiarlaget samarbeider om å halde dei tilsette i karantene ved båtane.
– Vi hadde håpt at det skulle vere færre smitta ved dei siste prøvene. Verftet og skipsagenten har vore eksemplariske i sitt arbeid. Etter kvart er også reiarlaget interessert i å samarbeide, etter at vi hadde nokre utfordringar innleiingsvis, seier Fylling.

Isolert ved hotell i Ålesund

Den første smitta mellom mannskapet på dei tre trålarane ved verftet blei påvist for kring to veker sidan. Helsetilstanden til dei smitta er etter forholda bra, og ingen har utvikla alvorleg sjukdom.
Dei som har vore smitta og isolert på Hotel Noreg i Ålesund, kan flytte tilbake etter kvart som dei er friskmelde, så lenge det ikkje er til hinder for karantenen om bord. Alle om bord i kvart skip må ha to negative testar før det er trygt å oppheve karantenen.

Har ikkje påvist smitte utanfor verftet

Verftet har mellom anna rutinar med døgnbemanning ved leiderane og i porten. Til no er det ikkje påvist smitte hos dei tilsette ved verftet, eller i lokalmiljøet elles.
–Skrekken frå dag éin har vore at det skulle spreie seg smitte på land, men det er ingen andre smitta i vår kommune som vi veit om, påpeiker kommunalsjef Kjetil Fylling.
Administrerande direktør Magne Standal ved Fiskerstrand Verft i førre veke at utbrotet i liten grad påverkar sjølve drifta.

Les også:

Fiskerstrand: