Vil fjerne flykø på Vigra

- Ja, det har vore ein kraftig auke i antal private jetfly. Spesielt gjeld det i sommarhalvåret, seier lufthamnsjef Tor Hånde.
Han opplyser at fleire av desse flya er så store at dei må parkerast på området for større fly.
- Her er det etter kvart trangt om plassen, slik at vi no byggjer ut ein ekstra flyoppstillingsplass, kanskje to.

Flykø

I dag har Ålesund lufthamn, Vigra sju oppstillingsplassar for større fly.
Hånde seier at av og til er det kø for å kome til.
- Ja, vi opplever at det må stå passasjerfly på taxebana og vente på å få parkert. Dette håper vi no å få ei løysing på.

Godt resultat

Ålesund lufthamn, Vigra, leverer gode plusstal til Avinor-konsernet, som ei av åtte lufthamner som går i pluss.
Lufthamna på Vigra fekk i 2019 eit driftsresultat etter avskrivingar på 26,2 millionar kroner. Det er 3,4 millionar betre enn resultatet i 2018.
Tor Hånde opplyser at avgiftsinntektene vart reduserte med over 600.000 kroner samanlikna med 2018, trass i at antal passasjerar auka. Årsaka til dette er at nivået på luftfartsavgiftene vart reduserte frå 2018 til 2019.
Dei kommersielle inntektene auka med 2,6 millionar kroner i 2019, og driftskostnadene vart reduserte med 1,4 millionar kroner.
Overskotet går inn i Avinor-konsernet.

Nytt ankomstbygg

Hånde seier at det neste store prosjektet er å utvide ankomstområdet.
- Målet er å byggje eit heilt nytt bygg litt lenger vest, men dette er ei stor investering som nok ligg nokre år fram i tid.
Han kan ikkje love at passasjerane kan gå under tak til og frå flya.
- Eg forstår at enkelte er frustrerte når ein må gå ute i vind og regn, men med dagens terminalløysing er det lite å gjere med dette.
- For å gå under tak, må vi nesten byggje ein heilt ny terminal, blant anna med avgang i andre etasje, og då snakkar vi svært store investeringar.