Vil gi tilreisande unike opplevingar

- Det var ikkje slik eg hadde tenkt det, men heldigvis har siste to vekene tatt seg kraftig opp med aktivitet.
Det seier Helge Kvam Karbø, som i fjor starta selskapet Fjord Nature.
Sunnylvingen har base på Hellesylt, men tilbyr turar og opplevingar i heile Hjørundfjorden, Norangsfjorden og endå vidare.
- Eg ønsker spesielt å løfte fram skjulte perler, seier 24-åringen.

Friluftsliv og naturguiding

Han er utdanna innan friluftsliv og naturguide ved Høgskulen i Volda, og har før det også tatt friluftsliv og ekstremsport ved Folkehøgskulen på Voss.
I tillegg til toppturar og andre turar til fots, satsar han stort på kajakk, både med kurs for nybyrjarar, og kurs i havpadling.
- Vi driv også med elvepadling, seier han.
Han har også gått til innkjøp av kanoar som kan blåsast opp.
- Dei er så lette at ein kan ein ta med over alt, i tillegg til at dei er trygge å bruke.

- Unike opplevingar

Kvam Karbø er opptatt av å auke turismen til Hjørundfjorden, men ikkje for einkvar pris.
- Dette skal vere unike opplevingar der ein kjem tett på naturen, men også aktivitetar som gir noko tilbake til dei som bur her.
No ser han etter endå ein tilsett.
- Ja, planen er å utvide gradvis. Resten av året ser bra ut.