Vil ha 400-500 i arbeid dei neste åra

Måndag fekk pressa sjå skroget til kystvaktskipet som i helga kom til Vard Langsten. Verftsarbeidarane skal no utruste, og til sist teste kystvaktskipet som vil få namnet «Jan Mayen».

Det første skipet blir etter planen levert neste haust. Deretter skal «Bjørnøya» leverast i 2023, og «Hopen» i 2024.

(saka held fram under)

400-500 i arbeid på skroget
Arbeidarane ved verftet i Tomrefjord sett i gong arbeidet med kjempeoppdraget med ein gong.

– Vi vil ha mellom 400 og 500 arbeidarar på dette prosjektet fram til det nærmar seg leveringsfase. Det vil vere tilsvarande for dei to neste skipa, opplyser prosjektleiar Roar Gjerde i Vard.

Det inkluderer folk frå fleire Vard-selskap, i tillegg til underleverandørar.

– Det vil vere fullt køyr her i tida framover, legg Gjerde til.

– Kjenner på ansvaret
Gjerde har ansvaret for at alt går etter planen med kjempeoppdraget som vil prege verftet i Tomrefjorden i meir enn to år framover.

– Det er klart at kjenner på ansvaret når det er ei stor kontrakt som går over lang tid. Det er mange ting å passe på, men vi har sett saman prosjektorganisasjonen vår slik at vi skal handtere dette på ein god måte, fortel han til NETT NO.

Prosjektleiaren fortel at dei følgjer tidsskjemaet mot planlagt leveringstid.

(saka held fram under)

Har arbeid - men vil ha meir
Vard-verfta også i Søviknes og Brattvåg har no godt med arbeid framover med eit cruiseskip til Viking Cruises og to trålarar inne til arbeid.

kommunikasjonssjef Hege Anita Akelvoll i Vard fortel at dei likevel jaktar meir arbeid for å fylle opp kapasiteten.

– Langsten kan til eksempel køyre fleire parallelle posjekt ved siden av kystvaktskipa, seier ho.

Milliardverdiar
Skroget som er slept til Langsten-verftet frå Romania dei siste vekene, er 136,4 meter langt og 21,4 meter breitt. I Romania har dei starta bygginga av dei neste skroga, og det neste kjem ved komande årsskiftet.

Verdien på oppdraget for Vard, var på 5,4 milliardar kroner då avtalen blei kjent. I tillegg til italienskeide Vard, deltok Westcon og Kleven i finalerunden om oppdraget.

Teknisk Ukeblad har tidlegare omtala korleis skipa mellom anna blir utstyrt med ein aktiv, skrogmontert sonar frå Kongsberg Maritime, laga hovudsakleg for krigføring mot ubåtar.