Vil ha like bra ordningar som tyrkiske verft

No vil dei norske verfta ha like gode ordningar som sine tyrkiske kollegaer. I motsett fall fryktar ein at fleire skipsverft vil seie opp heile eller deler av arbeidsstokken fordi ein ikkje klarer å sikre tilstrekkeleg arbeidskapital og byggjelån til å gjennomføre prosjekta.
Det går fram i eit høyringsbrev til Nærings- og fiskeridepartementet etter at regjeringa har hatt ei høyringsrunde rundt GIEK og Eksportkreditt Norge si rolle.
I dag kan norske skipsverft få ein byggjelånsgaranti på finansiering av skip på inntil 50 prosent av lånebeløpet i byggjeperioden.
Dette meiner Norske Skipsverft er for lite, og foreslår at summen vert auka til 75 prosent og dei totale rammene auka.

Gode tyrkiske vilkår

Norsk Skipsverft viser til at i Tyrkia er vilkåra betydeleg betre for verfta gjennom finansiering via den statlege eksportkredittbanken Eximbank.
Norske Skipsverft meiner å vite at banken både fungerer som byggelånsbank for verftet og sikrar langtidsfinansiering for reiarlaga som byggjer ved tyrkiske verft.
"Vi oppfatter at opplegget er basert på ca. 20 prosent innbetaling til verftet fra rederiet og resterende 80 prosent får verftet låne fra Eximbank. Rederiet kan få 10-12 års kreditt med lav rente," skriv Norske Skipsverft i høyringsfråsegna, og antyder at renta ligg på 1,5 prosent.
Norske Skipsverft forstår at både GIEK og Eksportkreditt Norge må forhalde seg til OECD-regelverket, og dermed neppe kan gi vilkår som er betre enn marknaden.

Vil ha hjelp med arbeidskapital

Men bransjeorganisasjonen oppfordrar styresmaktene om å vere så proaktive som muleg, spesielt i den krevjande omstillingsfasen verftsindustrien er i etter offshore-boomen.
I tillegg til auka byggjelånsfinansiering og auka samla rammer, meiner Norske Skipsverft at Eksportkreditt Norge i langt større grad enn i dag bør få anledning til å finansiere opp prosjekt der GIEK gir garantiar. Her vert det spesielt nemnt arbeidskapital og byggjelån.
"Det er styrets holdning at i skipsbyggingsprosjekter hvor staten er inne og gir garantier, bør staten også kunne finansiere opp prosjektene. Vi tenker at en naturlig avgrensning mot initiativ fra det private bankvesen ikke er til hinder for en slik praksis," skriv organiasjonen i høyringsfråsegna.

Støtte frå LO

Landsorganisasjonen i Norge støttar i si høyringsfråsegn Norske Skipsverft i kravet om å få auka rammer til lånefinansiering.
LO viser til at det knapt finst eitt norskbygt skip der ikkje ordninga er tatt i bruk.
No foreslår LO å doble rammene i byggjelånsordninga.

Evaluering

Høyringa er bygt på evalueringsrapporten "Evaluering av GIEK og Eksportkreditt Norge AS" utarbeidd av Oslo Economics, BDO og Erik Holtedahl.
Bakgrunnen er Stortingsmelding 27 (2016-2017) Industrien – grønnere, smartere og mer nyskapende - der det framgjekk at regjeringa ville gjennomføre ei evaluering av GIEK og Eksportkreditt Norge for å se nærare på korleis eksportfinansieringssystemet fungerer.
Tema i evalueringa av GIEK og Eksportkreditt Norge har vore å få belyst måloppnåinga, om ressursbruken er effektiv og om heilheita i det offentlige eksportfinansieringstilbodet fungerer godt.