Vindkraft-avtale for Vertikal Service

Vertikal Service i Volda har inngått ein rammeavtale med selskapet Siemens Gamesa Renewable Energy (SGRE) om å drive service og vedlikhald på vindkraftanlegg, skriv Møre-Nytt.

Siemens Gamesa Renewable Energy lagar turbinar til vindkraftanlegg.

Vertikal Service nyttar klatreteknikk og -utstyr i staden for stillast ved vedlikehaldarbeid og service på høge installasjonar. Utgangspunktet var arbeid på oljeinstallasjonar, men selskapet har arbeidd i fleire år for å få innpass også i vindkraftbransjen. Selskapet har omlag 60 tilsette.

-Vind, i tillegg til vasskraft, har vore ein viktig strategi dei tre siste åra. Det tek tid å kvalifisere seg, og vi har bygd opp erfaring over tid. Dette er første kontrakten som også omfattar service på vindturbinar. No er vi ein heilskapleg service- og vedlikehaldsleverandør i vindmarknaden, seier prosjektdirektør Åsmund Vaage, til Møre-Nytt. Vaage er grunnleggar og største eigar i selskapet.

16 millionar kroner
Kontrakten med Siemens er på to år, med opsjon på forlenging i eitt år til. Verdien er på rundt seks millionar i år, og ti millionar neste år.

I år skal Vertikal Service arbeide på vindparkar i Rogaland, neste år også på vindparkar på Austlandet og i Nord-Noreg.

Oljeprisfallet i 2014 sende sjokkbølgjer inn i marknaden for vedlikehald og utbetring. I løpet av to år var arbeidsstokken til Vertikal Service redusert frå 45 til 14, men i 2016 snudde det.

Driftsinntektene steig frå 14 millionar kroner i 2016 til 47 millionar i 2019, som er sist tilgjenglege reknskap.