Cruisetrafikken held fram med å auke i norske hamner etter pandemien og Ålesund har blitt størst.

Med over 650.000 cruisepassasjerar i 2023 ligg Ålesund i statistikktoppen som den mest besøkte destinasjonen i fjor. Det er ein auke på over 237.000 cruisepassasjerar sidan 2022. Bergen var den mest besøkte destinasjonen i fjor målt etter talet på anløp og nest mest besøkte destinasjon etter passasjertal, med opp mot 610.000 cruisepassasjerar i fjor.

I 2023 var det 474 fleire anløp av cruiseskip og 1,9 millionar fleire cruisepassasjerar enn året før, skriv Kystverket.

Med unntak av pandemiåra 2020 og 2021 har det sidan 2016 vore ein jamn auke i både cruiseanløp og cruisepassasjerar. Cruisetrafikken i 2023 er dobla samanlikna med 2016.

Kystverket anslår ein auke på fire prosent i talet på cruiseanløp i 2024. Talet på cruisepassasjerar er forventa å auke med seks prosent.