Karrierevalg - har du bestemt deg?

Datoen 1. mars kjem stadig nærmare, då skal kanskje du saman med fleire tusen andre ungdomar, gjere eit viktig utdanningsval.
Vi som er vaksne og har funne vår veg kan likevel lett tenke tilbake og kjenne på følelsen av å ikkje heilt vite kva utdanninga og vaksenlivet skal bli. Spennande, frydefullt, skummelt og ei erkjenning av at dette faktisk er viktig.
Åra i grunnskolen og vidaregåande skole skal vere dei åra som legg grunnlaget for vegen den enkelte ungdom vel. Skolen, elevane og dei føresette arbeider saman for å gi elevar god nok informasjon til å reflektere, aleine og saman med andre, og treffe det rette valet.
Å skaffe seg ei utdanning blir meir og meir viktig i samfunnet vårt. Berre få arbeidsplassar er igjen til dei som ikkje har skaffa seg formell kompetanse. Samfunnet har endra seg sidan foreldregenerasjonen din starta på sin karriereveg.
Dette sett eit press på dagens elevar. Utdanning er eigentleg ikkje noko val lenger, sjølv om det å gå i vidaregåande skole er valfritt. Dei aller fleste går på vidaregåande skole i dag. Slik må det også vere for å få skaffe seg kompetansen som er naudsynt for å kome inn på arbeidsmarknaden.
Ikkje tenk for mykje på media sitt fokus på utfordringane i olje- og gassnæringane. Ikkje tenk for mykje på at du kanskje kjem til å stå utan jobb når utdanninga di er over.
Det vil sannsynligvis ikkje bli slik som vi trur likevel, utdanning i dag tek frå 4 og kanskje opp til 8 år.
Jobbar som fanst for 10 år sidan ser ein ikkje lenger, jobbar som finst i dag vil ikkje vere der om 10 år. Utviklinga i samfunnet gjer at endringane også i mangfaldet av yrke går veldig fort.
Meir enn 90% av alle ungdomar som søkjer vidaregåande skole i Møre og Romsdal får kome inn på sitt høgaste ønske. Det er eit godt utgangspunkt. Dei elevane som er motiverte for det utdanningsprogrammet dei vel har størst sjanse til å lukkast.
Dei aller fleste har gode sjansar til å kome i mål med utdanninga si, men det kostar arbeidsinnsats. Utdanning er noko du tek, ikkje noko du får.
Skolane har fokus på vurdering for læring, karriererettleiing, tilpassa opplæring og læringsmiljø – vi vil at du skal lykkast med skolegangen din.
Snakk med dei som står deg nærast på skolen og snakk med dei heime. Det er slik ein blir klokare og kan ta eit val som er bevisst og målretta.
Vi forstår at det er utfordrande. Vi kan ikkje ta valet for deg, men vi kan vere med på vegen slik at dei steinane som er verdt å snu er snudd før du trykkjer på send-knappen i VIGO.
Om du startar på studiespesialiserande eller yrkesfaglege utdanningsprogram er ikkje det viktigaste. Det viktigaste er at du startar på noko du trivest med i kvardagen. Hugs at å starte på yrkesfaglege utdanningsprogram ikkje stenger nokon dører for høgare utdanning. Det finns vegar inn på høgskolar og universitet også frå yrkesfag.
Det luraste du kan gjere no er å gjere ditt beste. Du må gjere alt du kan for å få mest mogleg ut av skoletida di. Sørg for at du held dørene opne til alle vala du kan ta seinare i livet.
Det kan du best gjere ved å møte på skolen kvar dag og gjere så godt du kan med skolearbeidet. All kunnskap du får er verdifull og gjer plattforma du skapar deg stødig å stå på.
Når du har gjort så godt du kan, då kan du vere tilfreds med deg sjølv.
Lykke til med valet ditt!

Runes Solenes Opstad

– konstituert fylkesutdanningssjef

Rose Mari Skarset

– seksjonsleiar – Karriere og oppfølging