ANALYSEDet er på mange måtar ein mygg som tek over elefant når nye og vesle Green Yard er den nye eigaren av Kleven Verft. Green Yard hadde 34,7 millionar kroner i driftsinntekter i 2019, som var første heile driftsåret til selskapet. Lønsemda var god, eit overskot før skatt på 3,5 millionar kroner. Det er ein resultatmargin på over 10 prosent. Til samanlikning var resultatmarginen for dei 21 største verfta i 2018 minus 15 prosent. Berre eitt verft, Vegsund Slip, hadde ein resultatmargin over 10 prosent.Hans Jørgen Fedog og dei to andre eigarane i Green Yard har altså starta godt. Men det er viktig å hugse dimensjonane på den nye eigaren når det skal vurderast kva som er rimeleg å vente at Green Yard kan få til på kort sikt. Den bokførte eigenkapitalen Green Yard var på fem millionar kroner ved utløpet av 2019, og selskapet hadde 365.000 kroner i kontantar eller på konto.Green Yard har tre eigarar som kvar eig ein tredjepart av selskapet; Feko (Hans Jørgen Fedog), FFS Marine (John Willy Nilsen og Cecilie Marensiusdatter) og Lundevågen Invest (Arne Mathiesen og Bjarne Lohndal).Lundevågen Invest er eit investeringsselskap utan inntekter og med negativ bokført eigenkapital i 2019.FFS Marine-tala for 2019 er ikkje offentleg enno. I 2018 hadde FFS Marine-konsernet 80 millionar kroner i driftsinntekter, 4,7 millionar kroner i resultat før skatt og ein bokført eigenkapital på 30 millionar kroner.Feko er eit investeringsseskap med 0,8 millionar kroner i bokført eigenkaptial i 2018.Fedog sjølv var forsiktig med å signalisere ambisjonane då han besøkte verftet torsdag denne veka, og understreka mellom anna kor viktig det er for bemanningsbehovet er at verftet finn ein kjøpar til forsyningsskipet som ligg ved verftet. Det canadiske reiarlaget som skulle ha båten kansellerte kontrakten etter at Kleven Verft gjekk konkurs, men finn Green Yard eit reiarlag som vil fullføre skipet ved Kleven gir det arbeid fem månadar fram i tid.Fem månadar med arbeid vil vere kjærkomne, både for dei Kleven-tilsette som får jobb, men og for Green Yard Kleven, som får ein mjukare start og betre tid til å hanke inn nye oppdrag.Sjansen for at Kleven Verft raskt kan bygge seg opp til eit verft med store nybyggingsoppdrag og over 1000 personar i sving innanfor porten er likevel liten, same kor positive bankane måtte vere til dei nye eigarane.Om ikkje verftet klarer å overtale reiarar til å betale for bygginga av skip undervegs, må det byggelån til, og då må verftet også ha kapital for å få bankane med seg. Om Fedog og partnarane lukkast med Kleven som dei har gjort med Green Yards vil kapitalen byggast opp, men det tek tid.Ombygging, reparasjon, vedlikehald og opphogging - som Green Yard driv med i Kvinesdal, er ein langt mindre risikabel aktivitet enn nybygging, og også lettare å finansiere. Vurderinga av sjansen for nybygging på Green Yard Kleven på kort sikt byggjer og på at det berre er offentleggjort kontraktar for 2,4 milliardar kroner hos norske verft så langt i år. Det var status ved inngangen til mai i år, og sidan er det ikkje offentleggjort fleire nybyggingskontraktar. Det er rett og slett ikkje så mange nybyggingsoppdrag å konkurrere om.Etter ein dramatisk konkurs er det lett å tenkje at Kleven er i ei særstilling, men spørsmålet no er om ikkje fleire verft dei siste åra har tæra på kapitalen i ein slik grad at dei ikkje lenger er i stand til - eller tek sjansen på - å inngå så store kontraktar som dei gjorde berre for få år sidan - i alle fall om dei må stå for finansieringa i byggeperioden sjølv.