Unnvikande Vestre

ANALYSE

Vestre skal vere frontfigur i Arbeidarpartiet sin kampanje for å vinne attende veljarane som ligg mellom Høgre og Arbeidarpartiet og gjenskape truverdet i næringspolitikken, skriv VG.

Det betyr mellom anna bedriftbesøk landet over framover til 1. mai.

Arbeidarpartiet gjer det dårleg på meiningsmålingane og partiet sine eigne undersøkingar viser at tilliten til Arbeidarpartiet er fallande på nesten alle saksfelt.

Tidlegare i år tona Arbeidarpartiet ned slagordet "Nå er det vanlige folks tur". No er det "Skape og dele som gjeld".

Denne veka møtte Vestre Knut Flakk frå Flakk Gruppen og Roger Hofseth frå Hofseth International i NRK sitt tv-debattprogram Debatten.

Det var utflytting til Sveits på grunn av det norske skattenivået - spesielt formuesskatten - tema.

Utfordringa med den norske formuesskatten - som Ap/Sp-regjeringa har auka - er at få andre land har ein slik skatt. Norske eigarar må dermed betale ein skatt utanlandske eigarar (og staten) slepp.

Flakk og Hofseth er initiativtakarar til "Aksjon for norsk eierskap", som hadde stiftingsmøte i Ålesund denne veka, og skal arbeide for å vinne opinionen og politikarane for å få fjerna formuesskatt på såkalla arbeidande kapital. Å bli invitert til tv-debatt dagen etter stiftingsmøtet er ein god start Flakk og Hofseth.

Dei færraste som betalar formuesskatt har formuen som kontantar på kistebotnen. Som regel er formuen aksjar i bedrifter, som eig og driv næringsverksemd. Pengane til å betale formuesskatten må hentast ut frå bedriftene - som utløyser utbytteskatt. I Debatten brukte Flakk seg og sin familie som døme: Med 1,3 milliardar i likningsformue aukar summen av formue- og utbytteskatt frå 9,1 millionar i 2021 til 18,2 millionar kroner i 2023. Medrekna effekten av desse skattane hadde Flakk Gruppen eit lite underskot allereie i 2021, og skatteauken regjeringa kom med i fjor fekk Flakk Gruppen til å legge hotellutbyggingar på is.

Negative konsekvensar, og ikkje minst negative konsekvensar for norsk eigarskap, med andre ord.

"Mener dokke med hånda på hjertet at norskeide bedrifter skal belastes vesentlig mer skattmessig enn utenlandskeide og statseide?", spurte Flakk Vestre og dei to andre politikarane i Debatten, SV-leiar Kjersti Bergstø Senterpartiets finanspolitiske talsperson Geir Pollestad.

Det er tydeleg at det er dette poenget Aksjonen for norsk eigarskap vil bruke for å nå sitt mål om å å fjerne formuesskatt på arbeidande kapital.

Dilemmaet som ulikebehandling av norske og utanlandske eigarar, som formuesskatten inneber ville Vestre ikkje svare på, sjølv om har fekk spørsmålet så direkte at det ikkje kunne misforståast. Spørsmålet frå Flakk og det Vestre sa etterpå i Debatten kom i slutten av sendinga. Du kan også lese utskrift av kva som blei sagt ved å klikke på Slik svarte Vestre i slutten av artikkelen.

Det kan godt hende Vestre tapte dragkampane innad i regjeringa då den bestemte seg for å blant anna auke i formuesskatten i fjor, og no har fått den utakknemlege jobben med å dempe misnøya og mistilliten det har skapt i næringslivet.

Men om strategien er overhøyre spørsmål og prøve å snakke seg bort frå problemstillinga tener det neppe neppe korkje partiet hans eller regjeringa han sit i.