27.000 fleire nordmenn i jobb

(NPK-NTB): Ved utgangen av 2023 var det fleire personar i jobb i Noreg enn året før. I fjerde kvartal viser tala at sysselsetjinga gjekk opp med 27.000.

Auken svarer til ein total vekst på 1 prosent. Veksten har vore størst i kommunal forvaltning. Her auka sysselsetjinga med 1,9 prosent, viser tal frå Statistisk sentralbyrå (SSB).

– Veksten i dei store næringane i kommunal forvaltning har vore sterk, spesielt undervisning. I tillegg har helse og sosial god vekst, seier seniorrådgivar Christoffer Berge i SSB.

Berge fortel i SSBs rapport at den private sektoren hadde lågast vekst med 0,7 prosent.

– Veksten i kommunal forvaltning gjer at dei fleste fylke har hatt ein nedgang i andelen som jobbar i privat sektor, seier seniorrådgivaren.

Tala gler arbeids- og inkluderingsminister Tonje Brenna (Ap).

– Aldri før har så mange hatt den tryggleiken ein jobb å gå til gir deg. Regjeringa prioriterer høg sysselsetjing gjennom trygg økonomisk styring og konkrete grep for å hjelpe folk inn i jobb, og vi ser det verkar, seier Brenna.

(©NPK)