NPK-NTB: Regjeringa skal styrkje forsvaret av Noreg med 600 milliardar kroner dei neste tolv åra.

– Denne planen er eit historisk løft for Forsvaret og inneber ei stor styrking av alle forsvarsgreiner, seier statsminister Jonas Gahr Støre (Ap).

Til saman skal staten bruke 1624 milliardar på forsvar fram til 2036. Då vil forsvarsbudsjettet vere nesten dobbelt så stort som det er i dag, målt i reell kroneverdi, ifølgje regjeringa.

– Regjeringa går inn for ei stor styrking av Sjøforsvaret, med nye fregattar, ubåtar og andre fartøy. Planen inneber også ei historisk satsing på vernet vårt mot lufttruslar, og regjeringa vil gå til innkjøp av Noregs første langtrekkjande luftvern. Vi vil også styrkje landsmakta ved å utvide Hæren frå éin til tre brigadar og auke Heimevernet til totalt 45.000 soldatar, seier Støre.

Nyheitene vart kunngjorde då regjeringa la fram langtidsplanen sin for forsvarssektoren fredag formiddag.

– Vi vil satse på eit sterkt forsvar i heile landet. Når vi bruker så mykje pengar på forsvar, må det gjerast på ein måte som skaper norske arbeidsplassar og investeringar, seier finansminister Trygve Slagsvold Vedum (SP).