Ap vil auke ytingane

Arbeidarpartiet vil sørgje for at dei lågaste ytingane og andre ordningar for dei som har minst, blir auka. Bustøtteordninga skal også styrkjast.

Det slo partiet fast i eit vedtak på landsmøtet fredag.

– Arbeidarpartiets mål er at nivået på trygdeytingane sikrar at folk kan leve anstendige liv, heiter det i uttalen som vart vedteken fredag.

Partiet slår også fast at dei skal sørgje for at bustøtteordninga skal fange opp fleire vanskelegstilte, særleg i lys av høge straumprisar og høg prisvekst.

Uttalen startar med eit tydeleg forsvar av arbeidslinja.

– Den sosialdemokratiske arbeidslinja handlar om å gi folk høve til arbeid. Om å stille krav, og å stille opp, heiter det i teksten.

Samtidig blir det understreka at verkemidla først og fremst skal bidra til å hjelpe folk tilbake til arbeidslivet.

– Når arbeid viser seg å ikkje vere mogleg, skal folk ha tryggleik for at dei vil få varig økonomisk støtte til eit godt og verdig liv, slår partiet fast.

Arbeidarpartiet vil også:

* Gå gjennom satsar for livsopphald for å sikre at dei gir eit grunnlag å leve av.

* Sikre at utbetaling av ulike ytingar skal samordnast betre, med mål om å gi folk som får ei betre oversikt og meir føreseielegheit

* Styrke Nav for å gi folk raskare og tettare oppfølging når dei treng det.

* Gjere det lettare å kombinere trygd og arbeid, slik at fleire får brukt arbeidsevna si.

* Gå gjennom overgangar frå yting til arbeid for å gjere det økonomisk føreseieleg og lønnsamt for folk å gå ut i arbeid eller arbeider meir.