Ap vil ha ungdomen ut i åkeren

Arbeidarpartiet foreslår eit nytt samarbeid for å rekruttere ungdom til sommarjobb i landbruket.

I sommar kan koronapandemien gjere det vanskeleg for gjestearbeidarar i landbruket å komme til Noreg. Det kan gi norsk ungdom verdifull arbeidserfaring, meiner Nils Kristen Sandtrøen, landbrukspolitisk talsperson i Ap.

Han fremja onsdag forslag i Stortinget om eit samarbeid mellom Nav, landbruket og fylkeskommunane med vidaregåande skular og studentane for å sikre at nettopp dette skjer.

– Når næringa treng fleire tusen hender i arbeid, og mange tusen ungdom manglar sommarjobb, må det handlast kraftfullt og tidsnok, seier Sandtrøen.