Kort fortalt

Auka formue for lakseeigarane

Verdiane til 51 laksemilliardærar steig nær 15 prosent.

20.09.2024

(NPK-NTB): Laksegigantane ropte varsku då regjeringa innførte lakseskatten. Eitt år seinare har dei auka formuane sine med 26 milliardar kroner.

Kapitals liste over Noregs 400 rikaste personar har 51 formuen sin frå sjømatnæringa. Sidan lakseskatten vart innført, har dei auka formuane sine med 26 milliardar kroner, skriv Klassekampen.

Det er ein auke på 14,9 prosent. Dei 51 laksemilliardærane eig i dag samanlagt verdiar for 174 milliardar kroner.

Bransjen tok kraftig til motmæle då grunnrenteskatt på havbruk vart vedteke. Geir Ove Ystmark, administrerande direktør i Sjømat Norge, meinte skatten ville «sløkke lysa langs kysten». Til Klassekampen seier han at vi framleis ikkje veit kva effekten av skatten vil bli.

– Selskapa er i ferd med å sluttføre innrapporteringa av grunnrenteskatten frå i fjor. Ingen veit kva effekten blir av han, seier Ystmark.

Skatterapportering for havbruket er utsett til 30. august, og skatterekninga er ikkje ferdig enno.

– Det vi veit, er at det har vore ei stor oppbremsing i investeringar og ein stor brems i utbygging av slakteri og så vidare. Det heng openbert saman med vedtaket om å innføre grunnrenteskatt, seier Ystmark.

(©NPK)

Publisert: 20.09.2024 08:56

Sist oppdatert: 20.09.2024 08:56

Mer om