Lokalmatprodusentar slit med prisauken

(NPK): Fleire lokale matprodusentar slit etter prisveksten på matvarer. Enkelte har måtta stansa produksjonen

Prisen på matvarer i butikkane har auka med heile 13,7 prosent sidan i fjor sommar, viser ferske tal frå Statistisk sentralbyrå. Det skriv NRK.

– Me høyrer frå nokre produsentar at det går treigare i år. Me får ikkje dei offisielle tala før i slutten av oktober, men me er nervøse og spente på om salet vil flata litt ut, seier kommunikasjonssjef Anne Mette Johnsen i Stiftelsen Norsk Mat.

I stiftinga er dei uroa over at færre nordmenn vel kortreist mat, som kan vera dyrare enn andre matvarer. Nedgangen har ført til at visse aktørar har måtta gje seg og stansa produksjonen.

Espen Kristiansen i SSB seier prisveksten som rår om dagen ikkje er noko landet har sett sidan 80-talet.

– Når me har fått ein så sterk prisvekt som no, og i tillegg har fått ein ganske høg renteauke, så er det naturleg at hushalda endrar på konsumet sitt, seier han.

(©NPK)