Auka renteinntekter for norske bankar

(NPK-NTB). Resultatet for norske bankar enda på 39,8 milliardar kroner i første halvår av 2024, ein nedgang på 1,5 milliardar samanlikna med same periode i fjor.

Resultatet etter skatt utgjorde 0,54 prosent av den gjennomsnittlege forvaltningskapitalen til bankane ved utgangen av første halvår av 2024, ifølgje nye tal frå Statistisk sentralbyrås (SSB) statistikk for bankar og kredittføretak.

Tala viser eit svakare, men framleis godt resultat, skriv SSB på nettsidene sine.

Rentenettoen til bankane, altså differansen mellom renteinntekter og rentekostnader, auka med 4,9 prosent samanlikna med same periode i fjor, til 65,5 milliardar kroner. Dei totale inntektene til bankane auka også med 28,9 prosent.

Samtidig auka kostnadene med 39,1 prosent samanlikna med første halvår av 2023. Bankane fekk også eit kredittap på utlån på 3,6 milliardar kroner, ein auke på 2,9 prosent.

– Auka kostnader og kredittap på utlån er nokre av faktorane som bidreg til det noko svakare resultatet etter skatt i første halvår 2024 samanlikna med 2023, skriv SSB.

Innskota utgjorde ein større del av finansieringa til bankane, og auka med 0,5 prosentpoeng. Dermed utgjorde innskota 69,1 prosent av gjelda til bankane. Utlån utgjorde 75,1 prosent av eigedelane til bankane ved utgangen av første halvår, ein auke på 1,0 prosentpoeng.

(©NPK)