Bankkundar har aldri vore mindre nøgde

(NPK-NTB): Medan renteinntektene til bankane har auka, har kundetilfredsheita sokke. Aldri før har norske bankkundar vore så misfornøgde, ifølgje ei ny undersøking.

Renteinnteninga til bankane gått i taket – og i første halvår fekk banknæringa ei renteinntening på 65 milliardar kroner. Men kundane jublar ikkje.

Ifølgje ei ny undersøking har privatkundane til banknæringa aldri vore mindre fornøgde enn dei er no, skriv Dagens Næringsliv.

– Tilfredsheita og kundelojaliteten i den norske bankbransjen er på eit historisk botnnivå, seier Fredrik Høst, som er dagleg leiar i Epsi Norway.

Selskapet har gjennomført årlege undersøkingar sidan 2003.

I undersøkinga i fjor fekk bankane sitt dårlegaste skotsmål frå kundane sidan 2004, då kundetilfredsheita fall til 67,7 av 100 moglege poeng. I år søkk kundetilfredsheita vidare ned til 66,8 poeng, som er det lågaste nivået nokon gong målt.

«Trygge og stabile bankar er viktige i urolege og usikre tider, men at det dannar seg eit inntrykk av ein rentefest hos bankane mens mange kundar slit med å få kvardagen til å gå rundt, kan oppfattast som umusikalsk», heiter det i rapporten.

Denne utgåva er basert på over 5600 djupneintervju med norske bankkundar, gjennomført i august.

(©NPK)