Ber om strakstiltak mot økonomisk kriminalitet

(NPK-NTB): Internasjonale kriminelle nettverk aukar no aktiviteten sin i Noreg. Det får storbanken DNB og NHO til å reagere.

– Viss vi ikkje gjer noko raskt, kan vi miste mykje verdiar ut av landet. Vi snakkar om milliardverdiar, åtvarar NHO-sjef Ole Erik Almlid overfor Dagens Næringsliv.

DNBs toppsjef Kjerstin Braathen seier at banken gjennom banktransaksjonar meiner å kunne sjå tydelege spor av at det urovekkjande kriminalitetsbiletet som er kjent frå Sverige, allereie manifesterer seg i Noreg.

– Det er noko vi kjenner til frå andre land, men som vi ikkje hadde sett noko særleg til i Noreg før i år. Vi ser at kriminelle nettverk no søkjer lokale moldvarpar, menneske som kan fronte denne verksemda. Dette er internasjonale kriminelle nettverk som vi veit også utøver brutal vald. Utviklinga vi opplever er ganske urovekkjande, seier ho.

DNB-sjefen fortviler over at den totale kampen mot kriminalitet ikkje er effektiv nok, sjølv om bankane gjer jobben sin, skriv avisa.

Braathen og Almlid etterlyser meir samarbeid og større deling av data for å få betre kriminalitetsnedkjemping.

– Dei ulike styresmaktene har ikkje god nok høve til å dele data seg imellom i offentlege etatar og organ. Og heller ikkje med næringslivet, seier Almlid.

Avisa sende justis- og beredskapsminister Emilie Enger Mehl (Sp) ein førespurnad om å kommentere saka allereie førre veke, men har førebels ikkje fått noko svar.

(©NPK)