Bergen Engines blir britisk

(NPK-NTB-Alexander Vestrum og Jonas Berge) Britiske Rolls-Royce har valt Langley Holdings som kjøpar av Bergen Engines. Tidlegare i år vart salet til eit russiskkontrollert selskap stansa.

Langley Holdings stadfesta tysdag at dei har signert kjøpsavtalen, men pressemeldinga vart seinare fjerna, skriv BT/E24.

Salet vart seinare på kvelden stadfesta av Rolls-Royce i ei pressemelding.

Prislappen for motorverksemda er 63 millionar. Det svarer litt over til 655 millionar kroner.

– Dette markerer byrjinga på ein ny æra for Bergen Engines, sa administrerande direktør Jon Erik Røv i Bergen Engines i meldinga frå Langley ifølgje næringslivsnettstaden.

– Vi trur denne avtalen vil gi Bergen Engines og dei tilsette ein ny eigar som kan ta selskapet til neste del av reisa, seier administrerande direktør Warren East i Rolls-Royce i pressemeldinga.

– Vi er glade for å ha komme fram til ein avtale med Rolls-Royce. Oppkjøpet av Bergen Engines er strategisk steg i utviklinga av avdelinga vår for kraftløysingar, og eg ser fram til ta imot dei over 900 tilsette i Bergen Engines i familiebedrifta vår, seier Anthony Langley, som er styreleiar og administrerande direktør i Langley Holdings.

I mars stansa styresmaktene salet av Bergen Engines til russiskkontrollerte TMH International av tryggingsårsaker. Då var prislappen 1,6 milliardar kroner. Handteringa av salet gjorde at stortingsfleirtalet retta sterk kritikk mot regjeringa i mai.

Av Bergen Engines' rundt 950 tilsette er rundt 650 baserte ved hovudkontoret på Hordvikneset i Bergen. Selskapet har laga motorar til ei rekkje norske forsvarsskip og har vedlikehaldsavtalar med både Forsvaret og fleire andre Nato-land, mellom dei USA.

Langley Holdings er eit industrikonsern med rundt 4.600 tilsette. Konsernet har base i England.