Bilkøyringa nærmar seg gamle høgder

Norske personbilar køyrde 3,6 prosent lengre i fjor enn året før. Dermed nærmar køyringa seg 2019-nivå. Elbilar køyrde i fjor 42 prosent lengre enn i 2020.

Den totale strekninga køyrd av norske personbilar var framleis 1,1 prosent lågare enn 2019, skriv Statistisk sentralbyrå (SSB).

I 2021 var den samla køyrelengda for norske køyretøy på norske og utanlandske vegar 45,1 milliardar kilometer. Oppgangen på 3,4 prosent kjem hovudsakleg av auka trafikk frå personbilar. Desse stod for 78 prosent av all køyring i fjor.

Varebilar og andre små godsbilar stod for 17 prosent av køyringa i fjor, medan lastebilar og bussar utgjorde høvesvis 4,5 og 1,1 prosent av trafikken.

Auken i talet på el- og hybridbilar heldt fram i 2021, og andelen køyring med desse auka tilsvarande. Den samla køyrelengda til norske elbilar auka med 42 prosent frå 2020 og utgjorde i overkant av 17 prosent av personbil-køyringa. Sidan 2017 har den samla køyringa med elbilar auka med 261 prosent. Strekninga lagt bak seg med bensinhybrid auka med 19 prosent i fjor.

Køyringa med bensin- og dieseldrivne personbilar gjekk ned med totalt 10,8 prosent i 2021, men om lag 70 prosent av personbiltrafikken blir framleis driven med fossilt drivstoff.