Elendig sal av nye bustader

(NPK-NTB): Salet av nye bustader har falle kontinuerleg sidan juli 2021. No blir fleire prosjekt utsett på grunn av manglande sal.

Tysdag la Boligprodusentenes Forening fram tal for igangsetjing og sal av nye bustader i oktober. Tala er lite lystig lesnad for dei som lever av å byggje bustader.

Salet av nye bustader i oktober i år er 23 prosent lågare enn i oktober 2021. Så langt i år har salet falle 21 prosent samanlikna med dei ti første månadene i fjor.

– Det er dessverre ikkje noko som tilseier at dette vil snu i år, seier administrerande direktør Lars Jacob Hiim i Boligprodusentenes Forening.

Ordrereserven minkar, og det blir planlagt permitteringar og oppseiingar. Hiim påpeikar at dette vil få konsekvensar for bedriftene og arbeidsplassar over heile landet.

– Det er no viktig å få kontroll på inflasjonen og redusere rentepresset. Innstrammingar i utlånsforskrifta vil forverre situasjonen i bustadmarknaden, seier Hiim.

Igangsetjinga av bustader i oktober 2022 er den nest lågaste sida Boligprodusentene byrja med månadlege målingar i 2010. Samtidig er igangsetjinga av nye bustader så langt i år likevel på same nivå som i 2021.

(©NPK)