Er brukt ein milliard på utval på sju år

(NPK-NTB): Under statsministrane Erna Solberg (H) og Jonas Gahr Støre (Ap) er det sett ned 189 utval til ein pris av 989 millionar kroner sidan 2017.

Dyrast av desse er Koronakommisjonen, som åleine kosta 36 millionar kroner, skriv Altinget.

Tala kjem fram i eit svar frå Støre på eit skriftleg spørsmål i Stortinget frå Frp-leiar Sylvi Listhaug.

Medan Solberg-regjeringa brukte 84 millionar kroner på 16 ulike utval under Kunnskapsdepartementet, er det brukt mest på utval under Justisdepartementet sidan regjeringa Støre tiltredde i 2021. 16 utval, som har behandla alt frå totalberedskap, sambuarlov og salærordninga til advokatane, har kosta rundt 80 millionar kroner for dei.

– Tidsbruk og kostnader knytt til utgreiing er ei investering i at tiltaka skal gi ønska måloppnåing. Ufullstendig eller manglande utgreiing aukar risikoen for at det blir tatt avgjerder som ikkje kan gjennomførast, som gir uønskte verknader eller som inneber sløsing med ressursane i samfunnet, skriv Støre i sitt svar til Frp-leiaren.

Billigast av alle utvala som er sette ned av dei to regjeringane i denne perioden, er eit utval som skal sjå på Yrkesskadeforsikringsloven. Det kosta berre 150.115 kroner.

(©NPK)