Etterlengta avklaring om USA-toll

NPK-NTB: Noregs sjømatråd er letta over at Noreg har fått same amerikanske tollsats som resten av EU, og at det no blir meir føreseieleg å forhalde seg til USA.

– Den førebelse avklaringa på tollsatsar gir ei etterlengta føreseielegheit for heile verdikjeda, og gjer det mogleg å planleggje framover for norske sjømateksportørar og amerikanske importørar. Dette i seg sjølv er positivt for etterspurnaden etter norsk sjømat i USA, seier administrerande direktør Christian Chramer i Norsk sjømatråd til NTB.

Auka etterspørsel
Trass turbulente tider heilt sidan president Donald Trump byrja å true om innføring av toll, har etterspurnaden etter norsk sjømat auka i USA.

Hittil i 2025 har USA vore Noregs største marknad for sjømat, med ein eksportauke på 38 prosent, til rekordhøge 8,7 milliardar kroner. Noreg har ein firedel av marknaden for nordatlantisk laks i USA, og er nest størst etter Chile som har 50 prosent av marknaden.

– No får vi avvente kva som kjem av fleire avklaringar medan vi held fram med å byggje marknad i USA og andre sentrale sjømatmarknader for Noreg, seier Chramer.

Justerer prisane
Berre nokre timar etter at tollsatsen på 15 prosent var eit faktum fredag, skriv administrerande direktør Tine Hammernes Leopold til TV 2 dei følgjer nøye med på situasjonen.

– No som det konkrete utfallet av tollsatsane stort sett er kjent, medfører det at vi må vi justere prisane. Det er først og fremst amerikanske kundar som får prisauke. Vi vurderer prisane ut frå konkurransesituasjonen i dei enkelte marknadene.