«Falske» setlar var ekte

(NPK-NTB): Pengesetlane som politiet beslagla i Ålesund fordi dei trudde dei var falske, viste seg å vere ekte. No beklagar politiet og legg bort saka.

Politiet i Ålesund beslagla i november ni 200-lappar og to 500-lappar som dei meinte var falske, men som så nokså profesjonelt laga ut. Dei meinte også at fleire kunne vere i sirkulasjon.

– Vidare etterforsking har no vist at setlane er ekte, skriv politiet i ei pressemelding der dei også beklagar det hende.

Straffesaka mot kvinna som prøvde å bruke setlane, er også lagd bort.

– Møre og Romsdal politidistrikt vil hjelpe kvinna med å erstatte verdien, for setlane er vurderte som skadd i samsvar med Noregs Banks regelverk, heiter det vidare.

Ein grundig analyse frå Kripos måtte til for å fastslå at det ikkje var noko muffins med pengesetlane.

Politiet meinte det var viktig å informere raskt sidan det er høgsesong for handel.

– Denne informasjonen viste seg å vere feil, det beklagar vi, avsluttar politiet.