Fekk innfridd dei viktigaste krava

il ta tid å få normal trafikk i gang igjenID: 18817056oppdatert og utvida

(NPK-NTB-Kenneth Kandolf Haug): Fellesforbundet, Parat og NHO Luftfart har vorte samde i forhandlingane i oppgjeret for Sas sine kabintilsette.

Klokka 7.31 stadfesta Parat at dei er samde, etter at Fellesforbundet hadde varsla semje vel ein halvtime tidlegare.

SAS sin noregssjef Kjetil Håbjørg seier til NTB at selskapet er glad for å kunne leggje streiken bak seg så fort. Når det gjeld flytrafikken seier Håbjørg at mykje nok vil vere på plass i løpet av dagen, men han påpeikar at det allereie er innstilte avgangar tysdag.

Vil ta tid å få normal trafikk
Tysdag morgon er over 30 SAS-flygingar innstilte på grunn av streiken.

– Alle som jobbar i SAS vil no gjere sitt ytste for å vareta kundane våre, og få trafikken i gang igjen på normal basis. Det vil nok ta noko tid, men viljen og evna er på topp, seier han.

Fly og mannskap må vere på rett stad til rett tid før alle avgangar kan gå som normalt.

Matpausar og fri
– Med det utgangspunktet arbeidsgivaren vår hadde i dette oppgjeret, der det skulle sparast, og vi i utgangspunktet måtte gi frå oss rettar mot meir lønn, er vi fornøgde med dette oppgjeret, seier leiar Martinus Røkkum for SAS Norge kabinforeining i Parat i ei pressemelding.

115 av dei 155 streikande er organiserte i Fellesforbundet, resten i Parat.

– Dei viktigaste krava våre har vorte innfridde. Vi har avtalt ein solid lønnsauke, meir helgefri og skikkelege matpausar på bakken, seier Fellesforbundet-leiar Jørn Eggum i ei pressemelding.

Skulle trappast opp onsdag
Parat skriv at det er oppnådd semje om 7,5 prosent lønnsvekst, og dessutan noko redusert arbeidsbelastning. Fellesforbundet har førebels ikkje oppgitt detaljar om avtalen.

I begge tilfelle må avtalen ut på uravstemming blant medlemmene i organisasjonane.

– SAS har vore villige til å strekkje seg langt. Ein opplever å ha tilsette som har strekt seg langt i ein periode der SAS har stått i ein veldig utfordrande situasjon, seier leiar Erik Lahnstein i NHO Luftfart til NTB.

Det er NHO Luftfart som har representert SAS i forhandlingane.

Lahnstein legg til at det er gitt både ein lønnsauke og justeringar i arbeidsforholda, både i form av helgefri og meir opning for pausar i løpet av arbeidsdagen.

Streiken skulle onsdag trappast opp til å omfatte 550 tilsette i Fellesforbundet og 240 i Parat.

(©NPK)