Fekk motorstans i Harøyfjorden

(NPK-NTB): Ein kjemikalietankar med 18 personar om bord har fått motorstans i Harøyfjorden i Romsdal. Det er lite drift og vind i området.

Det dreier seg om ein kjemikalietankar på vel 120 meter, opplyser vakthavande redningsleiar Oddgeir Andersen ved Hovudredningssentralen Sør-Noreg til NTB.

– Vêrforholda speler på lag, det er lite drift og vind, fortel han.

Skipet sende ut mayday like før klokka 7 måndag morgon.

Eit kystvaktskip og ein ambulansebåt er på veg til staden. Det er også andre skip i nærleiken som kan setje slep på tankaren om det blir nødvendig, melder redningssentralen på Twitter.

Ved 9-30-tida opplyser redningssentralen at det er sett slep på skipet.