Fellesforbundet braut forhandlingane

Fellesforbundet har brote forhandlingane om lønnsoppgjeret med Norsk Industri. Dermed må partane møte hos Riksmeklaren.

– Forhandlingane går ikkje raskt nok framover. Vi treng meir struktur i arbeidet og nokon som borrar i krava våre. Derfor er det på tide å ta dette vidare, seier Fellesforbundets leiar Jørn Eggum.

Tysdag ettermiddag møter partane Riksmeklaren for å planleggje frivillig mekling, opplyser han.

– Når arbeidsgivar ikkje er villig til å komme krava våre i møte, har vi behov for Riksmeklarens hjelp for å komme vidare, seier Eggum.

Lønnsforhandlingane gjekk i gang onsdag førre veke då Fellesforbundet og Norsk Industri overrekte kvarandre krava sine.

Medan Fellesforbundet krev auka kjøpekraft til medlemmene sine etter to magre år, maner Norsk Industri til varsemd. Bakteppet er krigen i Ukraina, som driv prisane i landet oppover.

Det tekniske berekningsutvalet (TBU) la sist veke fram ein oppdatert prognose for kor mykje prisane vil stige i Noreg år. Der vart prisveksten oppjustert frå 2,6 til 3,3 prosent.

Lønnsoppgjeret er eit såkalla hovudoppgjer, altså blir det forhandla både om lønn og andre rettar.

Først ut er Fellesforbundet, Parat og Norsk Industri, som utgjer det såkalla frontfaget. I praksis betyr det at konkurranseutsett industri forhandlar først og set ramma for etterfølgjande oppgjer.