Fjerde år med underskot for Brisk

Rekneskapane til Brisk-selskapa for 2023, viser at konsernet hadde eit nytt underskot – det fjerde i rekka.

Inntektene sank nokre millionar til drygt 89 millionar, samanlikna med året før.

Også underskotet vart mindre, enn året før (sjå tabell under).

I løpet av fjoråret kom 173 menneske i arbeid med støtte frå Brisk, ifølgje årsmeldinga. Det er ein nedgang frå rekordåret 2022, då heile 226 personar kom i arbeid.

Konsernet med hovudkontor på Moa består av fire ulike selskap, Brisk Karriere, Brisk Utvikling, Brisk Barnehage og Brisk Bakeri.

Til saman hadde dei 118 tilsette i arbeid fordelt på 80 årsverk i fjor. I løpet av året er det mellom anna gjort ein emisjon i Brisk Bakeri, som hadde negativ eigenkapital allereie i 2022.

Nyleg blei det kjent at Brisk har vunne nye anbod for kring 115 millionar dei neste fem åra.

Ålesund kommune overtok i løpet av 2023 Møre og Romsdal fylkeskommune sine aksjar i Brisk As, og er no største eigar.